Փարիզի Ivry-sur-Seine արվարձանում է տեղադրված Ֆրանսիայի ազգային հերոս, հայ ժողովրդի փառավոր զավակ Միսակ Մանուշյանի հուշարձանը:

Տուֆ, բրոնզ: Բարձրությունը՝  280

Փարիզի ֆաշիստական օկուպացիայի տարիներին ֆրանսիական Դիմադրության  շարժման պարտիզանական ջոկատը գլխավորում էր  քաջարի Միսակ Մանուշյանը: Ծնունդով նա Արևմտյան Հայաստանից էր, որտեղ նրա ընտանիքի անդամները   զոհ էին  գնացել 1915թ. Օսմանյան կայսրությունում կազմակերպած հայոց  եղեռնին:

Հրաշքով փրկված Միսակը Լիբանանից հետո հայտնվեց  Փարիզում:

Երկրորդ Համաշխարհային պատերազմի տարիներին նա իր ջոկատով քայքայիչ գործունեություն էր ծավալել Փարիզը գրաված ֆաշիստական օկուպանտների դեմ:  Մ. Մանուշյանի դիմադրության խմբում տարբեր ազգության մարդիկ կային՝ռուսներ, լեհեր, հրեաներ, հունգարացիներ, իտալացիներ, իսպանացիներ: Ջոկատի գործունեությունը սարսափի էր մատնել թշնամուն, ովքեր կարողացան  հաղթանակի նախօրեին՝ 1944 թվ. կալանել Մանուշյանին իր զինակիցների հետ:  Ֆաշիստները նրանց անասելի կտտանքների և ապա մահապատժի ենթարկեցին:

Երկրորդ  համաշխարհային պատերազմի ավարտից հետո ազատագրված երկիրը չմոռացավ պարտիզանների սխրանքը և Մանուշյանը դարձավ Ֆրանսիայի ազգային հերոս: 1976թվ. պատերազմի վետերանների  Սովետական կոմիտեն դիմեց Ա.Հարությունյանին՝ ՛՛Ազատության մարտիկ՛՛Միսակ Մանուշյանի  արձանը  կերտելու խնդրանքով:

Մուգ կարմիր տուֆից պատրաստված  հուշարձանն այժմ  տեղադրված է Փարիզի Իվրի արվարձանի (Ivry-sur-Seine)  զինվորական գերեզմանոցում: 1978թ. Ֆրանսիայի և ԽՍՀՄ իշխանությունները կազմակերպեցին հուշարձանի հանդիսավոր  բացումը՝  քանդակագործ Ա. Հարությունյանի և նրա կնոջ՝Ջուլիայի, Ֆրանսիայում ԽՍՀՄ դեսպանի, Փարիզի և Իվրի շրջանի քաղաքապետների մասնակցությամբ: Հերոսի  բրոնզե ոգեղեն դիմաքանդակը տեղակայված է  տուֆե կոթողին, որին դրոշմված է  հետևյալ մակագրությունը՝  ՛՛Փառք նրան, ով զոհվեց, որպեսզի Ֆրանսիան ապրի՛՛: Ահա այսպես, արվեստի միջոցով ամրագրվեց  պատմական ընդհանրական հիշողությունը:

  2014 թվ. պաշտոնական այցով Հայաստան ժամանեց Ֆրանսիայի գործող նախագահ Ֆրանսուա Օլանդը:  Նա իր խոսքը նվիրեց Արա Հարությունյանի կողմից անմահացված  Միսակ Մանուշյանի Ֆրանսիայում երբեք չմոռացվող սխրանքին:

 Հասցե՝ Cimetiere d’Ivry, avenue de Verdin,30,  Ivry-sur-Seine, Paris, France